برطانیہ نے پاکستان کے خلاف ایک اور بڑا قدم اٹھانے کا اعلان کردیا

?️ 12 اپریل 2021

لندن (سچ خبریں) ایک طرف جہاں دنیا بھر میں کورونا وائرس کی تیسری لہر شدت سے جاری ہے وہیں برطانیہ نے تعصب کا اظہار کرتے ہوئے پاکستان کے خلاف بڑا قدم اٹھاتے ہوئے پاکستان کو ریڈ لسٹ میں شامل کر لیا تھا جس کے تحت پاکستان سے آنے والوں کا کورونا ٹیسٹ منفی ہونا چاہیے تھا اور صرف وہی لوگ پاکستان سے برطانیہ سفر کرسکتے تھے جو برطانوی یا آئرش شہریت کے حامل ہوں لیکن اب ایک بار پھر برطانیہ کی جانب سے پاکستان کے خلاف ایک اور بڑا قدم اٹھانے کا اعلان کردیا گیا ہے۔

تفصیلات کے مطابق برطانیہ نے پاکستان کے خلاف ایک اور بڑا قدم اٹھاتے ہوئے پاکستان کو 21 ہائی رسک ممالک کی فہرست میں شامل کردیا ہے۔

برطانوی حکومت کے مطابق دہشتگردی کی مالی معاونت اور منی لانڈرنگ کے مسائل سے دوچار ملک خطرہ ہیں، منی لانڈرنگ، دہشتگردی کی معاونت جیسے مسائل سے دوچار ممالک کو فہرست میں شامل کیا جاتا ہے۔

برطانوی حکومت کی رپورٹ کے مطابق پاکستان اور برطانیہ کے درمیان ناجائز رقوم کا تبادلہ جاری ہے، برطانیہ میں منی لانڈرنگ اینڈٹیررسٹ فنانسنگ ریگولیشن 2021مارچ میں نافذ ہوا۔

واضح رہے کہ اس سے قبل برطانیہ نے پاکستان کو سفری پابندیوں کی ریڈ لسٹ میں شامل کیا تھا اور پاکستان کے علاوہ فلپائن، کینیا اور بنگلادیش کو بھی ریڈ لسٹ میں شامل کیا گیا تھا۔

برطانوی حکام کے مطابق 9 اپریل سے برطانیہ میں داخل ہونے والے تمام مسافروں کو دس روز کے لیے قرنطینہ میں رہنا پڑے گا، اطلاق ان مسافروں پر بھی ہوگا جو ٹرانزٹ فلائٹ پر ان ممالک جائیں گے۔