برطانیہ کی نئی صہیونی بستیوں کے منصوبے پر شدید تنقید 

سچ خبریں:برطانوی حکومت نے مقبوضہ مغربی کنارے  میں اسرائیل کی جانب سے 13 نئی صہیونی بستیاں تعمیر کرنے کے منصوبے کو شدید تنقید کا نشانہ بناتے ہوئے اسے بین الاقوامی قوانین کی صریح خلاف ورزی قرار دیا ہے۔

یہ بھی پڑھیں: فلسطینی بستیوں کی توسیع سے غافل نہیں ہیں

قطری نشریاتی ادارے الجزیرہ کی رپورٹ کے مطابق، برطانیہ کے وزیر برائے امورِ مشرق وسطیٰ نے اسرائیلی حکومت کے اس فیصلے پر سخت ردعمل ظاہر کرتے ہوئے کہا کہ نئی یہودی آبادکاری نہ صرف فلسطینیوں بلکہ خود اسرائیلیوں کی سلامتی کو بھی خطرے میں ڈالتی ہے، اور یہ اقدام عالمی قانون کے تحت غیرقانونی ہے۔

انہوں نے مزید کہا کہ اسرائیل کو چاہیے کہ وہ مغربی کنارے میں صہیونی آبادکاروں کے ہاتھوں فلسطینیوں پر ہونے والے حملوں اور تشدد کو روکے اور ساتھ ہی آبادکاری کے عمل کو فوری طور پر بند کرے اور مغربی کنارے کو اسرائیلی سرزمین میں شامل کرنے کے منصوبے سے باز آئے۔

واضح رہے کہ چند روز قبل اسرائیلی میڈیا نے انکشاف کیا تھا کہ اسرائیلی کابینہ نے مغربی کنارے میں 13 نئی صہیونی بستیاں تعمیر کرنے کی منظوری دے دی ہے، جنہیں اب آزاد و خودمختار شہر تصور کیا جائے گا۔

یہ منصوبہ اسرائیلی وزیر خزانہ بیتزالئیل اسموتریچ کی تجویز پر پیش کیا گیا تھا۔ ان کے مطابق اس منظوری سے مغربی کنارے میں بستیوں کی توسیع کا عمل آسان ہو جائے گا اور اسرائیل کی موجودگی مزید مستحکم ہو گی۔

مزید پڑھیں:مغربی کنارے میں نئی صہیونی سازش بے نقاب 

اسرائیل کے اس اقدام کو نہ صرف فلسطینی اتھارٹی بلکہ عالمی سطح پر بھی تنقید کا نشانہ بنایا جا رہا ہے۔ انسانی حقوق کے ادارے اور کئی مغربی حکومتیں اس منصوبے کو دو ریاستی حل کی راہ میں رکاوٹ اور کشیدگی میں اضافے کا سبب قرار دے رہے ہیں۔