برطانیہ میں سیاسی بحران؛ وزیراعظم مستعفی

?️ 22 جون 2026

سچ خبریں:برطانیہ میں سیاسی بحران شدت اختیار کرنے کے بعد وزیراعظم کر اسٹیمر نے آج اپنے عہدے سے استعفیٰ دینے کا اعلان کر دیا ہے۔

برطانوی وزیراعظم کر اسٹیمر نے بڑھتے سیاسی دباؤ کے بعد اپنے عہدے سے استعفیٰ دے دیا۔ رپورٹ کے مطابق لیبر پارٹی میں داخلی اختلافات اور انتخابی شکستوں نے ان کے استعفے کی راہ ہموار کی۔

سی این این کے مطابق کر اسٹیمر نے ایک بیان میں کہا کہ وہ برطانیہ کے وزیر اعظم اور لیبر پارٹی کے سربراہ کے عہدے سے مستعفی ہو رہے ہیں اور اب وہ اپنے خاندان کے ساتھ زیادہ وقت گزاریں گے۔

انہوں نے لیبر پارٹی سے کہا کہ وہ ان کے جانشین کے انتخاب کے لیے باقاعدہ ٹائم ٹیبل طے کرے اور امیدواروں کی نامزدگی ۹ جولائی سے شروع کی جائے گی۔

اسٹیمر نے کہا کہ وہ اقتدار کی منظم منتقلی کو یقینی بنانے کے لیے ہر ممکن تعاون کریں گے اور اپنے جانشین کی مکمل حمایت کریں گے۔

ان کے مطابق وہ ایک ایسے برطانیہ کے منتظر ہیں جو ان کے بقول دو سال پہلے کے مقابلے میں زیادہ مضبوط اور منصفانہ ہو گا۔

برطانوی میڈیا پہلے ہی یہ رپورٹ دے چکا تھا کہ سیاسی دباؤ اور لیبر پارٹی کے اندر اختلافات کے باعث ان کا استعفیٰ متوقع تھا۔

یہ استعفیٰ اس وقت سامنے آیا جب چند روز قبل برطانوی وزیر دفاع جان ہیلی نے بھی اپنے عہدے سے استعفیٰ دے دیا تھا۔ انہوں نے دفاعی بجٹ سے متعلق اختلافات کو اپنی علیحدگی کی وجہ قرار دیا تھا اور کہا تھا کہ اسٹیمر کی دفاعی پالیسی ناکام ہو سکتی ہے۔

برطانوی وزیراعظم کے دفتر نے کہا ہے کہ اسٹیمر نئی قیادت کے انتخاب تک ڈاؤننگ اسٹریٹ میں اپنے فرائض انجام دیتے رہیں گے اور یہ عمل پارٹی کے اندرونی انتخابات کے ذریعے مکمل کیا جائے گا۔

نظام کے مطابق برطانیہ میں حکمران جماعت کا لیڈر ہی وزیر اعظم بنتا ہے، اس لیے لیبر پارٹی کے نئے رہنما کے انتخاب کے بعد بادشاہ کی جانب سے نئے وزیر اعظم کی تقرری کی جائے گی۔

سی این این کی رپورٹ کے مطابق اگرچہ کر اسٹیمر 2024 کے انتخابات میں واضح اکثریت سے کامیاب ہوئے تھے، لیکن ان کی مقبولیت جلد ہی کم ہونا شروع ہو گئی۔

انہیں ایک طرف دائیں بازو کی جانب سے غیر قانونی امیگریشن پر ناکامی کے باعث تنقید کا سامنا کرنا پڑا، جبکہ بائیں بازو نے ان کی معاشی پالیسیوں کو غیر مقبول قرار دیا۔

مقامی انتخابات میں بھی ان کی جماعت کو شدید نقصان اٹھانا پڑا، جہاں لیبر پارٹی نے 1400 سے زائد نشستیں کھو دیں اور ویلز کی پارلیمنٹ کا کنٹرول بھی ہاتھ سے نکل گیا۔

ان شکستوں کے بعد پارٹی کے اندر یہ تاثر مضبوط ہوا کہ کر اسٹیمر آئندہ عام انتخابات میں کامیابی حاصل نہیں کر سکیں گے، جو 2029 کے موسم گرما تک ہونے ہیں۔