اسرائیلی دہشت گردی کے خلاف امریکا میں بڑے پیمانے پر ملین مارچ کا انعقاد، متعدد سیاسی اور سماجی شخصیات کی شرکت

?️ 29 مئی 2021

واشنگٹن (سچ خبریں) فلسطینیوں پر اسرائیلی دہشت گردی کے خلاف امریکا میں بڑے پیمانے پر ملین مارچ کا انعقاد ہورہا ہے جس میں متعدد سیاسی اور سماجی شخصیات شرکت کررہی ہیں۔

تفصیلات کے مطابق فلسطینیوں کے خلاف اسرائیلی ریاست کے مظالم کے خلاف آج ہفتے کے روز امریکی دارالحکومت واشنگٹن میں ملین مارچ کا اعلان کیا گیا ہے، یہ ملین مارچ امریکا میں موجود مسلمان، عرب اور فلسطینی کمیونٹی کی طرف سے بلایا گیا ہے۔

موصولہ اطلاعات کے مطابق اسرائیلی ریاست کو سزا دینے اور اس کے جرائم کی روک تھام کے عنوان سے منعقدہ مظاہرے میں امریکا کی نمائندہ سیاسی اور سماجی شخصیات شرکت کریں گی۔

یہ ملین مارچ ایک ایسے وقت میں منعقد کیا جا رہا ہے جب دوسری طرف حال ہی میں اسرائیل نے فلسطین کے علاقے غزہ کی پٹی پر وحشیانہ بمباری کے دوران سیکڑوں فلسطینیوں کو شہید اور زخمی کیا۔

امریکی ریاست ٹیکساس میں موجود ایک مقامی رہنما انجینیر مرجان ابو محمود نے بتایا کہ مظاہروں کا اہتمام  امریکا کی دوسری ریاستوں نیویارک، شیکاگو، ڈیربورن، ٹکساس اور سان فرانسسکو میں بھی منعقد کیے جائیں گے۔

ملین مارچ کو کامیاب بنانے کے لیے سوشل میڈیا پربھی اپیلیں کی گئی ہیں، اس عظیم الشان مظاہرے میں انسانی حقوق کے مندوبین اور سیاسی اور سماجی کارکن شرکت کریں گے۔