حماس کا مسجدالاقصی میں صہیونی پرچم مارچ پر شدید انتباہ

سچ خبریں:فلسطینی مزاحمتی تحریک حماس نے صہیونی آبادکاروں کی جانب سے ماہ مئی میں مسجدالاقصی کے مکمل دروازے کھولنے اور وہاں پرچم مارچ کے انعقاد کے اعلان پر شدید ردِعمل کا اظہار کرتے ہوئے اسے یہودیانے کی ایک سنگین سازش قرار دیا ہے۔

فلسطینی خبررساں ادارے شہاب نیوز کی رپورٹ کے مطابق، حماس کی قیادت نے خبردار کیا ہے کہ اس قسم کی اشتعال انگیز سرگرمیاں مسجدالاقصی کی تاریخی و مذہبی حیثیت کو تبدیل کرنے کی ناپاک کوشش ہیں اور اس کے نتائج انتہائی خطرناک ہوں گے۔

حماس کے سیاسی دفتر کے رکن اور امورِ قدس کے سربراہ ہارون ناصرالدین نے بدھ کے روز ایک بیان میں کہا کہ صہیونی آبادکاروں کی جانب سے مسجدالاقصی کے دروازے مکمل طور پر کھولنے کا مطالبہ، اس کے صحنوں میں تلمودی رسومات مسلط کرنے کی کوششوں کا تسلسل ہے، جس کا مقصد مسجد کو منہدم کر کے نام نہاد ہیکل سلیمانی تعمیر کرنا ہے۔

یہ بھی پڑھیں:فلسطینی عیسائیوں کی صیہونی فلیگ مارچ کی مذمت

ناصرالدین نے انکشاف کیا کہ صہیونی تنظیمیں، خاص طور پر ہیکل کی علمبردار گروہ، اسرائیلی وزیر برائے داخلی سلامتی ایتمار بن گویر سے مطالبہ کر رہی ہیں کہ وہ 25 اور 26 مئی کو مسجدالاقصی کی مکمل آزادی کا اعلان کرے۔ ان مطالبات کو بن گویر کی پالیسیوں اور حمایت حاصل ہے۔

ناصرالدین نے کہا کہ یہ وقت ہے کہ تمام فلسطینی، خصوصاً بیت المقدس کے عوام اور 1948 کے مقبوضہ علاقوں میں رہنے والے فلسطینی، مسجدالاقصی کے دفاع کے لیے متحد ہوں، خاص طور پر اس وقت جب مغربی کنارے کے باشندوں کو مسجد میں داخلے سے روکا جا رہا ہے۔

انہوں نے زور دیا کہ فلسطینی قوم ہرگز ان صہیونی منصوبوں کو کامیاب نہیں ہونے دے گی، انہوں نے کہا کہ صہیونی حلقے کھلے عام مسجد الاقصی کو تباہ کرنے اور اس کی جگہ جعلی معبد تعمیر کرنے کی بات کر رہے ہیں، اور یہ دھمکیاں صرف فلسطین نہیں، بلکہ پوری امت مسلمہ کے لیے خطرے کی گھنٹی ہیں۔

مزید پڑھیں:صہیونیوں کا اصلی ہدف مسجد اقصیٰ کو تباہ کرنا ہے: انصار اللہ

ناصرالدین نے تمام عرب اور اسلامی اقوام، حکومتوں اور علماء سے مطالبہ کیا کہ وہ صہیونی سازشوں کے خلاف فوری اور فیصلہ کن مؤقف اختیار کریں۔ انہوں نے کہا کہ مسجدالاقصی امت مسلمہ کا قلب ہے اور اس کے دفاع کے لیے صرف فلسطینی عوام نہیں، بلکہ پوری امت کی ذمہ داری ہے۔