ٹرمپ کا امریکی محکمہ انصاف سے 230 ملین ڈالر ہرجانے کا مطالبہ

ٹرمپ کا امریکی محکمہ انصاف سے 230 ملین ڈالر ہرجانے کا مطالبہ

 امریکی صدر ڈونلڈ ٹرمپ نے کہا ہے کہ وہ محکمہ  انصاف (Department of Justice) سے 230 ملین ڈالر کے ہرجانے کے حقدار ہیں، کیونکہ ماضی میں ان کے خلاف کی جانے والی وفاقی تحقیقات نے انہیں مالی اور سیاسی نقصان پہنچایا۔

خبر رساں ادارے فرانس پریس (AFP) نے نیویارک ٹائمز کے حوالے سے رپورٹ دی ہے کہ ٹرمپ کے وکلا نے وزارتِ انصاف سے تقریباً 230 ملین ڈالر کا ہرجانہ طلب کیا ہے۔ یہ معاوضہ ان تحقیقات کے بدلے میں مانگا جا رہا ہے جو 2024 کے صدارتی انتخابات میں ٹرمپ کی کامیابی سے قبل ان کے خلاف کی گئی تھیں۔

ٹرمپ نے منگل کی شب (29 اکتوبر) اپنے بیان میں کہا یہ فیصلہ خود میری منظوری سے مشروط ہے، اور یقیناً اپنے ہی لیے ادائیگی کی منظوری دینا ایک عجیب بات ہوگی، مگر میں نے واقعی بہت نقصان اٹھایا ہے۔

انہوں نے مزید کہا کہ وزارتِ انصاف شاید مجھ پر ایک بڑی رقم کی مقروض ہے۔ ٹرمپ نے کہا کہ اگر وہ یہ رقم حاصل کر لیتے ہیں تو اسے “کسی نیکی کے کام” کے لیے خرچ کریں گے، مثلاً خیراتی اداروں یا وائٹ ہاؤس کے منصوبوں میں۔

یاد رہے کہ ٹرمپ اپنی پہلی صدارت کے بعد کئی وفاقی تحقیقات کا سامنا کر چکے ہیں — جن میں خفیہ دستاویزات کی غیر محفوظ نگہداشت اور 2020 کے انتخابی نتائج کو کالعدم قرار دینے کی کوششوں سے متعلق کیسز شامل تھے۔

ٹرمپ کا یہ تازہ اقدام امریکہ میں ایک نئی قانونی اور سیاسی بحث کو جنم دے رہا ہے، کیونکہ کسی موجودہ صدر کی جانب سے وزارتِ انصاف کے خلاف مالی دعویٰ دائر کرنا ایک غیر معمولی اور تاریخی واقعہ سمجھا جا رہا ہے۔