وینزویلا کی جانب سے ٹرمپ کے  استعماری دعوؤں کی شدید مذمت

?️ 20 دسمبر 2025

وینزویلا کی جانب سے ٹرمپ کے  استعماری دعوؤں کی شدید مذمت

اقوام متحدہ میں وینزویلا کے سفیر نے امریکی صدر ڈونلڈ ٹرمپ کی جانب سے وینزویلا کے قدرتی وسائل سے متعلق حالیہ بیانات کو سختی سے مسترد کرتے ہوئے انہیں استعماری سوچ اور بین الاقوامی قوانین کی کھلی خلاف ورزی قرار دیا ہے۔ وینزویلا کا کہنا ہے کہ ایسے دعوے عالمی نظام کے لیے خطرناک ہیں۔

اقوام متحدہ کی جنرل اسمبلی کے اسی ویں اجلاس سے خطاب کرتے ہوئے وینزویلا کے سفیر سیموئل مونکاڈا نے، عالمی یومِ انسدادِ استعمار کے موقع پر، امریکا سے مطالبہ کیا کہ وہ اقوام متحدہ کے چارٹر کا احترام کرے۔ انہوں نے کہا کہ امریکی صدر کے بیانات وینزویلا کی خودمختاری پر براہ راست حملہ ہیں۔

مونکاڈا کے یہ ریمارکس اس بیان کے بعد سامنے آئے جس میں ٹرمپ نے دعویٰ کیا تھا کہ وینزویلا کی زمین اور تیل کے وسائل عملاً امریکا کے ہیں اور انہیں امریکی کنٹرول میں آنا چاہیے۔ وینزویلا کے سفیر نے وائٹ ہاؤس کی اس زبان کو مہذب عالمی اقدار کی توہین قرار دیا اور کہا کہ یہ انیسویں صدی کی نوآبادیاتی پالیسیوں کی واپسی کی علامت ہے۔

انہوں نے کہا کہ امریکی صدر تاریخ کا پہیہ پیچھے موڑ کر وینزویلا کو اپنی نوآبادی بنانا چاہتے ہیں اور ایسے بیانات کے خلاف کوئی بھی قانونی جواز پیش نہیں کیا جا سکتا۔ ان کے مطابق ٹرمپ انتظامیہ عالمی تعلقات میں افراتفری اور تباہی کو فروغ دے رہی ہے۔

سیموئل مونکاڈا نے استعمار کو جارحیت کا جرم قرار دیتے ہوئے کہا کہ اگرچہ روایتی استعمار کی شکل بدل چکی ہے، مگر اب کنٹرول کے نئے اور زیادہ تباہ کن طریقے اختیار کیے جا رہے ہیں۔ انہوں نے فلسطین اور پورٹو ریکو سمیت ان تمام علاقوں سے یکجہتی کا اظہار کیا جو غیر ملکی تسلط کا شکار ہیں، اور کہا کہ یہ صورتحال عالمی انسانی حقوق کے منشور کے منافی ہے۔

یہ ردعمل ایسے وقت میں سامنے آیا ہے جب واشنگٹن اور کاراکاس کے درمیان کشیدگی میں اضافہ ہو رہا ہے۔ امریکی صدر نے حالیہ دنوں میں وینزویلا کے تیل اور توانائی کے وسائل سے متعلق بیانات دہراتے ہوئے ان پر قبضے کی دھمکی دی اور وینزویلا آنے جانے والے تیل بردار جہازوں کی ناکہ بندی کا دفاع کیا۔

ٹرمپ نے امریکی کمپنیوں کو وینزویلا سے نکالے جانے پر شدید ناراضی کا اظہار کرتے ہوئے دعویٰ کیا کہ وینزویلا نے امریکی تیل اور توانائی پر غیر قانونی طور پر قبضہ کیا ہے اور امریکا اسے واپس لے گا۔ اس کے ساتھ ہی کیریبین میں امریکی فوجی موجودگی میں اضافہ اور وینزویلا کے قریب فضائی گشت نے دونوں ممالک کے درمیان تناؤ کو مزید بڑھا دیا ہے۔