نیتن یاہو کنسٹ تحلیل کرنے اور قبل از وقت انتخابات پر غور کر رہے ہیں

نیتن یاہو کنسٹ تحلیل کرنے اور قبل از وقت انتخابات پر غور کر رہے ہیں

 اسرائیلی وزیرِ اعظم بنیامین نیتن یاہو اس وقت کنسٹ کی تحلیل اور قبل از وقت انتخابات کے امکان پر سنجیدگی سے غور کر رہے ہیں۔ یہ انکشاف اسرائیلی اخبار یدیعوت آحارنوت نے سیاسی ذرائع کے حوالے سے کیا ہے۔

رپورٹ کے مطابق،حریدی جماعتوں کو لازمی فوجی خدمت سے مستثنیٰ قرار دینے کے متنازع قانون اور حکمراں جماعت لیکود کے اندرونی اختلافات کے باعث حکومتی اتحاد شدید دباؤ کا شکار ہے۔ انہی حالات کے پیشِ نظر نیتن یاہو نے اپنے قریبی مشیروں کو ہدایت دی ہے کہ کنسٹ کی قبل از وقت تحلیل اور جون 2026  میں انتخابات کے ممکنہ انعقاد کے لیے تیاری شروع کی جائے۔ اس صورت میں انتخابات مقررہ وقت سے تقریباً چار ماہ پہلے ہوں گے۔

اخبار کے مطابق نیتن یاہو نے نہ صرف لیکود کی انتخابی مہم کے لیے ایک ٹیم تشکیل دینے کی ہدایت دی ہے بلکہ پارٹی کے اندر امیدواروں کی فہرست طے کرنے کے لیے اندرونی انتخابات کی تیاری کا بھی کہا ہے۔ تاہم وہ عوامی بیانات میں اب بھی موجودہ حکومت کی مدت مکمل کرنے اور وقت پر انتخابات کرانے پر زور دیتے دکھائی دیتے ہیں۔

سیاسی ذرائع کا کہنا ہے کہ نیتن یاہو نجی نشستوں میں حریدی جماعتوں کے فوجی استثنا سے متعلق قانون کی منظوری کے بارے میں پُرامید نظر آتے ہیں، لیکن ساتھ ہی انہوں نے یہ بھی تسلیم کیا ہے کہ اگر یہ قانون یا ریاستی بجٹ منظور نہ ہو سکا تو اتحاد کسی بھی وقت ٹوٹ سکتا ہے اور کنسٹ تحلیل ہو سکتی ہے۔ اسی خدشے کے تحت انہوں نے اپنے اندرونی حلقے کو ہر ممکنہ صورتحال کے لیے تیار رہنے کی ہدایت دی ہے۔

رپورٹ میں یہ بھی کہا گیا ہے کہ اگرچہ کابینہ کے وزرا ظاہری طور پر نیتن یاہو کے اطمینان بخش بیانات کو دہرا رہے ہیں، لیکن ان کی عملی سرگرمیاں انتخابی مہم کی تیاری کی نشاندہی کرتی ہیں۔ سخت گیر وزیرِ خزانہ بتسلئیل اسموٹریچ اقتصادی اصلاحات کو تیز کر رہے ہیں، جبکہ قومی سلامتی کے وزیر ایتامار بن گویر فلسطینی قیدیوں کے لیے سزائے موت کے قانون کو نمایاں طور پر آگے بڑھا رہے ہیں اور اسے جارحانہ انداز میں عوامی مہم کا حصہ بنا رہے ہیں۔

سیاسی مبصرین کے مطابق، ان اقدامات کا مقصد ووٹرز میں اپنی مقبولیت بڑھانا اور ممکنہ انتخابات کی صورت میں زیادہ ووٹ حاصل کرنا ہے۔

یہ تمام پیش رفت ایسے وقت میں ہو رہی ہے جب حریدی جماعتوں کے ساتھ فوجی خدمت کے قانون پر اختلافات اور لیکود کے اندر بڑھتی بے چینی نے اسرائیلی سیاسی منظرنامے کو مزید غیر یقینی بنا دیا ہے، جس سے قبل از وقت انتخابات کے امکانات مزید مضبوط ہو گئے ہیں۔