لوور میوزیم کی ڈائریکٹر سینیٹ میں طلب، چوری شدہ زیورات کی ابتدائی مالیت 88 ملین یورو

لوور میوزیم کی ڈائریکٹر سینیٹ میں طلب، چوری شدہ زیورات کی ابتدائی مالیت 88 ملین یورو

 فرانس کے مشہور لوور میوزیم کی سربراہ لورنس دی کار (Laurence des Cars) کو آج  فرانسیسی سینیٹ کی ثقافتی کمیٹی کے سامنے پیش ہونا ہوگا تاکہ وہ اس حیران کن چوری کے بارے میں وضاحت پیش کریں جس نے پورے ملک میں سیاسی اور میڈیا ہلچل مچا دی ہے۔ ابتدائی اندازوں کے مطابق، چوری ہونے والے قیمتی زیورات کی مالیت تقریباً 88 ملین یورو بتائی جا رہی ہے۔

یہ مسلح ڈکیتی گزشتہ اتوار کو محض سات منٹ میں انجام پائی، جس کے بعد سے فرانس اور دنیا بھر کے ذرائع ابلاغ میں یہ واقعہ سرخیوں میں ہے۔ چوری کے فوراً بعد میوزیم کی سربراہ نے استعفیٰ پیش کیا، تاہم ان کا استعفیٰ وزیرِ ثقافت رشیدہ داتی اور صدر ایمانوئل میکرون نے قبول نہیں کیا۔

فرانسیسی خبر رساں ویب سائٹ "وان منوت” کے مطابق، لورنس دی کار آج پہلی بار خاموشی توڑتے ہوئے سینیٹرز کے سامنے تفصیلی وضاحت دیں گی کہ اتنی سخت سیکیورٹی کے باوجود چور کس طرح قیمتی جواہرات چرا کر فرار ہونے میں کامیاب ہوئے۔

لورنس دی کار نے مئی 2021 میں لوور میوزیم کی باگ ڈور سنبھالی تھی، اور وہ اس ادارے کی پہلی خاتون سربراہ ہیں۔ لوور دنیا کا سب سے زیادہ دیکھا جانے والا میوزیم ہے، جس نے 2024 میں 9 ملین سے زائد وزیٹرز کو اپنی طرف متوجہ کیا، جن میں سے تقریباً 80 فیصد غیر ملکی تھے۔

میوزیم تین دن کی بندش کے بعد آج دوبارہ عوام کے لیے کھول دیا گیا ہے، جب کہ چوری میں ملوث افراد کی تلاش جاری ہے۔ تاحال کسی مشتبہ شخص کو گرفتار نہیں کیا گیا، تاہم اس واقعے نے فرانسیسی ثقافتی ورثے کی سیکیورٹی پر سنگین سوالات اٹھا دیے ہیں۔

وزیرِ ثقافت اور وزیرِ داخلہ لوران نونیز نے ملک بھر کے گورنرز کو ہدایت دی ہے کہ وہ قیمتی ثقافتی ورثے کے تحفظ کے لیے سیکیورٹی اقدامات میں فوری بہتری لائیں اور تمام اہم نوادرات کی قومی فہرست تیار کریں تاکہ آئندہ ایسے واقعات سے بچا جا سکے۔