ضاحیہ حملے میں حزب اللہ کے سینئر کمانڈر کو نشانہ بنایا:حزب اللہ 

?️ 25 نومبر 2025

 ضاحیہ حملے میں حزب اللہ کے سینئر کمانڈر کو نشانہ بنایا:حزب اللہ 

 اسرائیلی وزیراعظم بنیامین نتن یاہو نے دعویٰ کیا ہے کہ ضاحیہ جنوبی بیروت پر اتوار کی شب کیے گئے فضائی حملے میں حزب اللہ کے ایک اعلیٰ فوجی کمانڈر کو نشانہ بنایا گیا، جبکہ حزب اللہ کا کہنا ہے کہ شہدا کے بارے میں باضابطہ بیان جلد جاری کیا جائے گا۔

الجزیرہ مباشر کے مطابق نتن یاہو نے کہا کہ اسرائیلی فوج نے ’’الطبطبائی‘‘ کو ہدف بنایا ہے جو حزب اللہ کے سینئر ترین کمانڈروں میں شمار ہوتے ہیں۔

انہوں نے دھمکی آمیز لہجے میں کہا کہ اسرائیل حزب اللہ کو دوبارہ اپنی عسکری قوت بحال کرنے کی اجازت نہیں دے گا اور وہ چاہتے ہیں کہ لبنانی حکومت حزب اللہ کو غیر مسلح کرے۔

اسرائیلی فوج کے سربراہ نے بھی یہی دعویٰ دہراتے ہوئے کہا کہ آج کی کارروائی میں حزب اللہ کے چیف آف اسٹاف کو نشانہ بنایا گیا۔ ان کے مطابق الطبطبائی تنظیم کی جنگی صلاحیتوں کی بحالی اور آئندہ معرکوں کی تیاری کے ذمہ دار تھے۔

دوسری جانب، حزب اللہ کی سیاسی کونسل کے نائب سربراہ محمود القماطی نے کہا کہ تنظیم جلد اپنا سرکاری بیان جاری کرے گی۔

انہوں نے واضح کیا کہ "ہم اپنے شہدا کے اعلان پر فخر کرتے ہیں، مگر دشمن کے دعووں کی تصدیق نہیں کرتے”۔

اتوار 2 آذر 1404 کو اسرائیلی فضائی حملے نے ضاحیہ جنوبی کے علاقے حارة حریک میں ایک رہائشی عمارت کو نشانہ بنایا، جس کے نتیجے میں عمارت تباہ اور قریبی دکانوں کو شدید نقصان پہنچا۔

لبنان کے صدر جوزف عون کا کہنا ہے کہ ملک کے یومِ آزادی پر ہونے والا یہ حملہ اسرائیلی ہٹ دھرمی اور بین الاقوامی مطالبات کی کھلی توہین ہے۔ انہوں نے عالمی برادری سے مطالبہ کیا کہ اسرائیلی جارحیت روکنے کے لیے فوری اور مؤثر اقدام کرے۔