صیہونیوں کی جانب سے غزہ میں جنگ بندی کی 1520 خلاف ورزیاں، 559 افراد جاں بحق

سچ خبریں:غزہ کی سرکاری انفارمیشن آفس نے ایک بیان جاری کرتے ہوئے انکشاف کیا ہے کہ گذشتہ 11 اکتوبر سے نافذ جنگ بندی کے معاہدے کے آغاز سے اب تک صیہونی فورسز نے 1520 مرتبہ اس معاہدے کی خلاف ورزی کی ہے، جس کے نتیجے میں 559 فلسطینی شہید ہوچکے ہیں جبکہ 1500 سے زائد زخمی ہوئے ہیں۔

سرکاری بیان کے مطابق، یہ خلاف ورزیاں بین الاقوامی قوانین اور جنگ بندی کے انسانی پروٹوکول کی صریح خلاف ورزی ہیں۔ صیہونی خلاف ورزیوں میں 522 مرتبہ فائرنگ، 73 مرتبہ فوجی سازوسامان کے ساتھ رہائشی علاقوں میں داخلہ، 704 ہوائی حملے اور بمباری، نیز 221 مرتبہ دھماکے کرکے غیر فوجیوں کے گھروں کی تباہی شامل ہیں۔

اعداد و شمار کے مطابق، اس عرصے میں شہید ہونے والے 556 فلسطینی غیر فوجیوں میں 288 خواتین، بچے اور بزرگ شامل ہیں جبکہ 268 مرد ہیں۔ زخمیوں کی تعداد 1500 ہے جن میں سے 900 سے زیادہ خواتین، بچے اور بزرگ ہیں جو رہائشی علاقوں میں اور جنگ بندی لائن (یلو لائن) سے دور نشانہ بنائے گئے۔

بیان میں مزید کہا گیا ہے کہ اس دوران 50 فلسطینی غیر فوجیوں کو صیہونی فورسز نے حراست میں لیا ہے، حالانکہ وہ سب جنگ بندی لائن سے دور تھے۔ امدادی اشیاء کے حوالے سے، غزہ میں اب تک صرف 29,603 ٹرک ہی داخل ہوسکے ہیں، جبکہ معاہدے کے تحت 69,000 ٹرک داخل ہونے تھے۔ اس کا مطلب ہے کہ صیہونی حکام نے محض 43 فیصد امدادی سامان ہی داخل ہونے دیا۔

ان میں سے 17,153 ٹرک امدادی سامان، 11,642 ٹرک تجارتی سامان اور صرف 800 ٹرک ایندھن لے کر آئے ہیں، جو کہ معاہدے کے تحت متعینہ ایندھن کی مقدار کا محض 14 فیصد بنتا ہے۔

غزہ کی سرکاری انفارمیشن آفس کے مطابق، صیہونی حکومت جنگ بندی کے انسانی پروٹوکول کے کسی بھی بنیادی شق پر عملدرآمد نہیں کررہی، جس میں متعینہ تعداد میں ٹرکوں کی آمد، فوج کی جنگ بندی لائن تک انخلا، ملبہ صاف کرنے والی بھاری مشینری کی آمد، طبی اور رہائشی سامان کی ترسیل، رفح بارڈر کراسنگ کی بحالی، اور غزہ کے پاور پلانٹس کی سرگرمیوں کی بحالی شامل ہیں۔

بیان میں خبردار کیا گیا ہے کہ صیہونی فورسز کی یہ کارروائیاں جنگ بندی معاہدے کی خطرناک خلاف ورزی ہیں، جو غیر فوجی آبادی کو ہتھیار ڈالنے، بھوک اور بلیک میلنگ پر مجبور کرنے کی کوششوں کا حصہ ہیں۔ ایسی صورتحال میں، امریکہ، جنگ بندی نگران، ثالث، ضامن ممالک، عالمی برادری اور اقوام متحدہ کو اپنی اخلاقی اور قانونی ذمہ داریوں کو نبھاتے ہوئے صیہونی حکومت پر دباؤ ڈالنا چاہیے کہ وہ جنگ بندی کا احترام کرے، غیر فوجیوں کے تحفظ کو یقینی بنائے، اور فوری طور پر محفوظ انسانی امداد، ایندھن اور رہائشی سامان کی ترسیل کی اجازت دے۔