صہیونی فوجی عہدہ دار کا اعتراف: اسرائیل حماس کو شکست دینے میں ناکام رہا

صہیونی فوجی عہدہ دار کا اعتراف: اسرائیل حماس کو شکست دینے میں ناکام رہا

صہیونی ذرائع ابلاغ نے ایک سینئر فوجی عہدیدار کے حوالے سے نقل کیا ہے کہ غزہ جنگ کے دوران اسرائیل حماس کو شکست دینے میں ناکام رہا ہے، جبکہ گزشتہ دو برسوں میں اسرائیلی فوج اور آبادکاروں کو بھاری جانی و مالی نقصان اٹھانا پڑا ہے۔

رپورٹس کے مطابق اسرائیلی فوج کے ریزرو جنرل اسحاق بریک نے اسرائیلی چینل 13 کو انٹرویو دیتے ہوئے کہا کہ غزہ جنگ نے اسرائیل کو شدید طور پر کمزور کر دیا ہے۔ ان کے مطابق گزشتہ دو سال کے دوران دو ہزار سے زائد اسرائیلی فوجی اور آبادکار ہلاک ہوئے جبکہ ہزاروں افراد زخمی ہوئے ہیں۔

اسحاق بریک نے کہا کہ جنگ کے نتیجے میں نہ صرف فوجی نقصان ہوا بلکہ اسرائیلی معاشرہ بھی اپنی سماجی اور قومی مضبوطی کھو چکا ہے۔ ان کا کہنا تھا کہ اس جنگ میں اسرائیل کو سیکڑوں ارب شیکل کا معاشی نقصان اٹھانا پڑا ہے۔

انہوں نے کھلے الفاظ میں تسلیم کیا کہ اسرائیل حماس کو ختم کرنے کے اپنے بنیادی ہدف میں ناکام رہا اور کہا کہ دو سالہ جنگ کے نتائج اسرائیل کے لیے انتہائی مہنگے ثابت ہوئے ہیں۔ ان کے مطابق اسرائیل نے مالی وسائل کے ساتھ ساتھ عالمی سطح پر اپنی ساکھ بھی کھو دی ہے۔

اسرائیلی جنرل نے مزید بتایا کہ سابق امریکی صدر ڈونلڈ ٹرمپ بھی اس نتیجے پر پہنچ چکے تھے کہ اسرائیل اس جنگ میں آگے بڑھنے کے بجائے ایک ہی جگہ پر رکا ہوا ہے اور کسی حتمی کامیابی تک نہیں پہنچ پا رہا، اسی وجہ سے امریکہ نے مداخلت کا فیصلہ کیا۔

واضح رہے کہ فلسطینی مزاحمت نے سات اکتوبر 2023 کو غزہ کے اطراف صہیونی بستیوں پر اچانک کارروائی کرتے ہوئے متعدد فوجی ٹھکانوں پر قبضہ کیا اور درجنوں اسرائیلیوں کو قید میں لیا تھا، جس کے بعد اسرائیل نے غزہ پر شدید فضائی اور زمینی حملے شروع کر دیے۔

اس جنگ کے دوران اب تک ستر ہزار سے زائد فلسطینی شہید ہو چکے ہیں، غزہ کے تقریباً ستر فیصد مکانات اور بنیادی ڈھانچہ تباہ ہو چکا ہے جبکہ محاصرے، قحط اور شدید انسانی بحران نے لاکھوں فلسطینیوں کی زندگی کو خطرے میں ڈال دیا ہے۔

ان تمام تر کارروائیوں کے باوجود اسرائیلی حکام خود اعتراف کر چکے ہیں کہ وہ نہ تو حماس کو ختم کر سکے ہیں اور نہ ہی اپنے قیدیوں کو غزہ سے واپس لا پائے ہیں، جو اس جنگ میں ان کے اہداف کی ناکامی کو ظاہر کرتا ہے۔