صومالی لینڈ میں اسرائیلی مداخلت افریقہ اور عالمی نظام کے لیے سنگین خطرہ:صومالی صدر

صومالی لینڈ میں اسرائیلی مداخلت افریقہ اور عالمی نظام کے لیے سنگین خطرہ:صومالی صدر

صومالیہ کے صدر حسن شیخ محمود نے صومالی لینڈ میں اسرائیل کی مبینہ مداخلت کو افریقہ اور عالمی نظام کے لیے ایک سنگین خطرہ قرار دیتے ہوئے خبردار کیا ہے کہ یہ اقدام صومالیہ کی خودمختاری اور علاقائی سالمیت کی کھلی خلاف ورزی ہے اور اس سے افریقہ کے سینگ  اور بحیرۂ احمر کے خطے کا استحکام شدید طور پر متاثر ہو سکتا ہے۔

صدر حسن شیخ محمود نے قطر کے دارالحکومت دوحہ میں منعقدہ 17ویں الجزیرہ فورم سے خطاب کرتے ہوئے کہا کہ صومالی لینڈ میں اسرائیلی حکومت کے اقدامات نہ صرف افریقی یونین کے منشور کے منافی ہیں بلکہ یہ ریاستوں کی خودمختاری میں خطرناک مداخلت کی مثال بھی ہیں۔

انہوں نے صومالی لینڈ کے علیحدگی پسند گروہوں کے ساتھ اسرائیل کے یادداشتِ تفاہم (MoU) کو غیرقانونی قرار دیتے ہوئے کہا کہ اس طرح کے معاہدے پورے خطے میں عدم استحکام کو بڑھاوا دے سکتے ہیں۔ ان کا کہنا تھا کہ دنیا اس وقت ایک “خطرناک دوراہے” پر کھڑی ہے جہاں بین الاقوامی قوانین اور ضابطوں کو نظرانداز کرنے کا رجحان بڑھتا جا رہا ہے، جو انسانیت کو عالمی جنگوں سے پہلے کے انتشار کی طرف لے جا سکتا ہے۔

صدرِ صومالیہ نے غزہ پر اسرائیلی جنگ کو جدید تاریخ میں غیرانسانی طرزِ عمل کی بدترین مثال قرار دیتے ہوئے کہا کہ فلسطین مسئلے کا منصفانہ اور جامع حل، خصوصاً دو ریاستی حل کے بغیر، خطے اور دنیا میں امن ممکن نہیں۔ انہوں نے خبردار کیا کہ اگر فلسطینی المیے کا کوئی حقیقی سیاسی حل تلاش نہ کیا گیا تو یہ عالمی امن و سلامتی کے لیے مستقل خطرہ بنا رہے گا۔

انہوں نے مزید کہا کہ اگرچہ دنیا میں سائنسی اور تکنیکی ترقی تیزی سے ہو رہی ہے، لیکن اس کے ساتھ ہی بین الاقوامی تعاون اور کثیرالجہتی نظام کو شدید چیلنجز کا سامنا ہے۔ ان کے بقول “حق کی طاقت” کی جگہ طاقت کا حق کا تصور عالمی نظام کو دوسری عالمی جنگ سے پہلے کے خطرناک حالات کی طرف دھکیل رہا ہے۔

حسن شیخ محمود نے دہشت گردی کے خلاف جنگ میں صومالیہ کے کردار پر بھی روشنی ڈالی اور کہا کہ ان کا ملک القاعدہ اور داعش کے خلاف فوجی، فکری، سیاسی اور معاشی محاذ پر بھرپور جدوجہد کر رہا ہے، جس سے نہ صرف صومالیہ بلکہ علاقائی اور عالمی سلامتی کو بھی فائدہ پہنچا ہے۔

انہوں نے بحیرۂ احمر کو عالمی تجارت کی شہ رگ قرار دیتے ہوئے کہا کہ اس آبی گزرگاہ میں کسی بھی قسم کی عدم استحکام کی کوشش عالمی معیشت پر منفی اثرات ڈال سکتی ہے۔ صدرِ صومالیہ نے اختتام پر عالمی برادری سے مطالبہ کیا کہ وہ بین الاقوامی قوانین کی خلاف ورزی کرنے والوں کو جوابدہ بنائے اور امن، سلامتی اور مشترکہ ترقی کی بنیاد پر عالمی نظام کو مضبوط کرے۔