ترکی کا اسرائیل سے تمام تجارتی و اقتصادی تعلقات ختم کرنے کا اعلان

ترکی کا اسرائیل سے تمام تجارتی و اقتصادی تعلقات ختم کرنے کا اعلان

ترکی کے وزیر خارجہ ہاکان فیدان نے اعلان کیا ہے کہ انقرہ نے اسرائیل کے ساتھ اپنے تمام اقتصادی اور تجارتی تعلقات ختم کرنے اور اپنی فضائی حدود کو صہیونی طیاروں پر بند کرنے کا فیصلہ کیا ہے۔

فیدان نے کہا کہ اسرائیل غزہ میں فلسطینی عوام کے خلاف اجتماعی قتل عام اور وحشیانہ بھوک مری کی پالیسی پر عمل پیرا ہے تاکہ انہیں اپنی سرزمین چھوڑنے پر مجبور کیا جا سکے۔ ان کے مطابق، تل ابیب امریکی حمایت کے بل بوتے پر دو ریاستی حل کو مکمل طور پر ختم کرنے کی کوشش کر رہا ہے۔

انہوں نے بتایا کہ ترکی، قطر اور مصر مل کر مسئلہ فلسطین کے حل کے لیے عملی اور مستقل راستہ تلاش کرنے کی کوشش کر رہے ہیں۔

فیدان کے بقول، اسرائیل کا اصل مقصد غزہ کو غیرقابلِ سکونت بنانا ہے تاکہ وہاں کے لوگ ہجرت پر مجبور ہو جائیں۔ اسی منصوبے کے تحت اسرائیلی وزرا اور انتہا پسند یہودی مسجدالاقصی پر حملے کر کے کشیدگی میں اضافہ کر رہے ہیں۔

ترکی کے وزیر خارجہ نے کہا کہ اسرائیل بین الاقوامی قوانین کی کوئی پرواہ نہیں کرتا اور شام میں ایک مستحکم اور طاقتور حکومت کے قیام کی راہ میں رکاوٹ ڈال رہا ہے، لیکن ہم ایسے اقدامات کی اجازت نہیں دیں گے۔

انہوں نے مزید کہا کہ اسرائیل کی پالیسیوں نے صرف غزہ ہی نہیں بلکہ قدس، مغربی کنارے، شام، ایران اور لبنان تک کو نشانہ بنایا ہے۔ ان کے مطابق، صہیونی جارحیت اور ایران کے ساتھ بڑھتی کشیدگی خطے کی سلامتی کے لیے سنگین خطرہ ہے۔