ایرانی عوام کے ساتھ کھڑے ہیں:روسی آرتھوڈوکس چرچ

روسی آرتھوڈوکس چرچ نے ایرانی عوام کے ساتھ مکمل یکجہتی کا اظہار کرتے ہوئے کہا ہے کہ وہ ان قوتوں کے خلاف ایران کے ساتھ کھڑا ہے جو معاشرتی استحکام کو نقصان پہنچانے اور تفرقہ پھیلانے کی کوشش کر رہی ہیں۔

ماسکو کے اسقفی حلقے کے شعبۂ خارجہ تعلقات کے سربراہ میٹروپولیٹن ولوکولامسک نے روسی آرتھوڈوکس چرچ کے سربراہ پاتریارک کریل کی جانب سے ایک خط میں یہ موقف پیش کیا۔ یہ خط اسلامی ثقافت و مواصلات تنظیم کے سربراہ حجت الاسلام محمد مہدی ایمانی پور کو ارسال کیا گیا۔

خط میں روسی مذہبی رہنما نے ایران کی حالیہ صورتحال سے آگاہی پر شکریہ ادا کرتے ہوئے کہا کہ روسی آرتھوڈوکس چرچ، مذہبی اور قومی جذبات کے غلط استعمال کے ذریعے سماجی عدم استحکام پیدا کرنے کی کوششوں پر گہری تشویش رکھتا ہے اور اس حوالے سے ایران کے مؤقف سے مکمل اتفاق کرتا ہے۔

میٹروپولیٹن ولوکولامسک نے واضح کیا کہ روسی آرتھوڈوکس چرچ ہمیشہ مقدسات کی توہین اور انسانیت کے لیے محترم اقدار کے غلط استعمال کے خلاف رہا ہے۔ انہوں نے ایران میں بعض مساجد پر حملوں کی مذمت کرتے ہوئے کہا کہ مقدس مقامات کی بے حرمتی اور مذاہب و اقوام کے درمیان امن کو نقصان پہنچانے کی ہر کوشش ناقابلِ قبول ہے۔

خط میں زور دیا گیا کہ کسی بھی مقصد کے نام پر آزاد ممالک کے اندرونی معاملات میں مداخلت، داخلی کشیدگی کو ہوا دینا اور عبادت گاہوں یا مؤمنین کو نشانہ بنانا ہرگز قابلِ جواز نہیں۔

روسی چرچ کے نمائندے نے کہا کہ ماسکو کی کلیسا ان حالات کی سنگینی کو بخوبی سمجھتی ہے، کیونکہ خود روسی آرتھوڈوکس چرچ کو یوکرین، مالدووا، ایسٹونیا اور دیگر ممالک میں سیاسی دباؤ، جبر اور بین الاقوامی قوانین و انسانی حقوق کی خلاف ورزیوں کا سامنا ہے۔

انہوں نے آخر میں کہا کہ روسی آرتھوڈوکس چرچ دعاگو ہے کہ خداوندِ متعال امن اور نظم کو بحال کرے، گمراہ عناصر کو بصیرت عطا کرے اور مظلوموں کو تسلی دے۔ ان کے مطابق مذہبی رہنما اس مقصد کے حصول میں اپنی ذمہ داری ضرور ادا کریں گے۔

واضح رہے کہ اس سے قبل جنوری 2026 میں اسلامی ثقافت و مواصلات تنظیم کے سربراہ نے مختلف الہامی مذاہب کی ممتاز شخصیات کو خطوط ارسال کر کے ایران میں حالیہ واقعات کے پس منظر اور ان کی امریکی و صہیونی نوعیت سے عالمی رائے عامہ کو آگاہ کرنے کی اپیل کی تھی۔