امریکی قابضین کے ہاتھوں شام کے 70 آئل ٹینکرز چوری

?️ 17 مئی 2022

سچ خبریں:امریکی فوج نے ایک بار پھر شام کا تیل چوری کرکے 70 ٹینکر عراق پہنچا دیے۔
شام کی سرکاری خبر رساں ایجنسی سانا کی رپورٹ کے مطابق شمال مشرقی شام کے مقامی ذرائع نے امریکی فوج کے ذریعے تیل کے کھیتوں سے نکالے گئے 70 آئل ٹینکروں کو عراق منتقل کرنے کا اعلان کیا، رپورٹ کے مطابق، ایندھن کے ٹینکروں کے ساتھ، 15 ٹرک فوجی سازوسامان سے لدے الولید کراسنگ کے ذریعے عراق میں داخل ہوئے۔

ان ذرائع کے مطابق یہ کراسنگ امریکی فوج نے بنائی ہے جو عراقی اور شامی حکومتوں کی طرف سے غیر قانونی ہے، واضح رہے کہ قابض امریکی افواج نے شامی ڈیموکریٹک فورسز(SDF) کے عسکریت پسندوں کے ساتھ مل کر الحسکہ اور دیر الزور صوبوں (جسے شام کا الجزیرہ علاقہ کہا جاتا ہے) میں تیل کے بڑے ذخیروں پر قبضہ کیا ہوا ہے اور یہاں سے تیل بیرون ملک اسمگل اور فروخت کر رہے ہیں۔

سانا کے مطابق شام کی تیل کی وزارت کے نئے اعداد و شمار کے مطابق اس ملک کے مشرقی علاقوں میں امریکی قابض افواج اور اس کے کرائے کے فوجی روزانہ 70000 بیرل شامی تیل چوری کرتے ہیں، یاد رہے کہ شام کے خلاف ایک دہائی کی جنگ کے دوران امریکہ نے دہشت گردی اور داعش کا مقابلہ کرنے کے بہانے علیحدگی پسند ملیشیا کی حمایت کی اور شام کے تیل سے مالا مال علاقوں پر قبضہ کر لیا جبکہ امریکہ کے سابق صدر ڈونلڈ ٹرمپ نے واضح کیا ہے کہ شام میں امریکی فوج کی موجودگی تیل کے کنوؤں کی وجہ سے ہے۔