امریکہ نے پہلی بار نائجیریا میں فوجی تعینات کی

امریکہ نے پہلی بار نائجیریا میں فوجی تعینات کی

امریکی افریقہ کمانڈ کے سربراہ جنرل ڈاگوِن اینڈرسن نے انکشاف کیا ہے کہ امریکہ نے نائجیریا میں ایک محدود تعداد پر مشتمل فوجی دستہ تعینات کر دیا ہے۔ یہ پہلا موقع ہے کہ کسی اعلیٰ امریکی عہدیدار نے نائجیریا میں امریکی فوج کی براہِ راست موجودگی کی سرکاری طور پر تصدیق کی ہو۔

جنرل اینڈرسن کے مطابق یہ تعیناتی دونوں ممالک کے درمیان سکیورٹی تعاون کے معاہدے کے تحت کی گئی ہے، جس کا مقصد دہشت گردی کے خلاف مشترکہ کوششوں کو مضبوط بنانا ہے۔ تاہم تعینات فوجیوں کی تعداد اور ان کے فرائض کی تفصیلات ظاہر نہیں کی گئیں۔ ان کا کہنا تھا کہ یہ دستہ نائجیریا کو خصوصی صلاحیتیں فراہم کرے گا۔

رپورٹس کے مطابق یہ اقدام دسمبر 2025 سے جاری مشترکہ کارروائیوں کے بعد سامنے آیا، جن کے نتیجے میں شمالی نائجیریا کی متعدد ریاستوں میں دہشت گرد حملوں کے منصوبے ناکام بنائے گئے۔

نائجیریا کی وزارت خارجہ نے بھی اس سٹریٹجک تعاون کی تصدیق کی ہے، جس میں انٹیلی جنس معلومات کا تبادلہ اور دیگر حفاظتی معاونت شامل ہے۔ ان کارروائیوں کا مرکزی ہدف دہشت گرد تنظیمیں بوکو حرام اور داعش مغربی افریقہ ہیں۔

واضح رہے کہ بوکو حرام نے 2009 میں اپنی سرگرمیاں شروع کیں، جو بعد ازاں ہمسایہ ممالک تک پھیل گئیں۔ اگرچہ 2015 میں اس کے خلاف کچھ کامیابیاں حاصل ہوئیں، تاہم نائجیریا اب بھی دہشت گردی سے شدید متاثر ہے اور حالیہ برسوں میں حملوں کی تعداد میں اضافہ دیکھا گیا ہے۔

نائجیریا گزشتہ ایک دہائی سے زائد عرصے سے دہشت گردی کے خلاف برسرِ پیکار ہے، جس کے نتیجے میں جھیل چاڈ کے علاقے میں ہزاروں افراد جان سے ہاتھ دھو بیٹھے جبکہ لاکھوں بے گھر ہو چکے ہیں۔