عمر شریف کو علاج کے لئے امریکا کا ویزا جاری کر دیا گیا

?️ 16 ستمبر 2021

کراچی (سچ خبریں)پاکستان کے لیجنڈری کامیڈین و اداکار عمر شریف کے امریکا سے علاج کروانے کے تمام انتظامات تقریباً مکمل ہوچکے ہیں حکومت نے انہیں اور ان کے اہلخانہ کو امریکا کے ویزے جاری کردیے گئے اور وہ جلد امریکا روانہ ہوں۔ویزا جاری ہونے پر مرتضی وہاب نے امریکی قونصل خانے کی ٹیم کا شکریہ ادا کیا۔

ایڈمنسٹریٹر کراچی مرتضیٰ وہاب نے سماجی رابطے کی ویب سائٹ ٹوئٹر پر کی گئی ٹوئٹ میں عمر شریف کے ویزا کے اجرا سے متعلق بتایا۔مرتضیٰ وہاب نے کہا کہ یہ بتاتے ہوئے خوشی ہورہی ہے کہ عمر شریف کا ویزا جاری کردیا گیا، معاونت پر امریکی قونصل خانے کی ٹیم کے مشکور ہیں۔

قبل ازیں ایک ٹوئٹ میں مرتضیٰ وہاب نے کہا تھا کہ یہ بتاتے ہوئے خوشی ہوں کہ عمر شریف کے اہلخانہ کے ویزا انٹرویوز آج ہوئے ہیں۔انہوں نے بتایا کہ ویزے کے اجرا کے لیے عمر شریف کی موجودگی سے استثنیٰ دینے پر امریکی قونصل خانے کے بہت مشکور ہیں۔مرتضیٰ وہاب نے مزید کہا کہ آئیں ہم سب مل کر برصغیر کے بہترین کامیڈین میں شامل عمر شریف کی صحت یابی کے لیے دعا کریں۔

دوسری جانب وزیراعظم کے معاون خصوصی ڈاکٹر شہباز گل نے بھی بتایا کہ عمر شریف اور ان کے اہلخانہ کو امریکا کے ویزے جاری کردیے گئے اب وہ جلد اپنے علاج کے لیے امریکا روانہ ہوں گے۔ڈاکٹر شہباز گل کے مطابق عمر شریف کے اہلخانہ نے اس عمل میں تعاون پر وزیراعظم پاکستان کا شکریہ ادا کیا۔معاون خصوصی کے مطابق وزیراعظم دعاگو ہیں کہ اللہ تعالی عمر شریف کو جلد صحتیاب کرے۔

گزشتہ روز حکومت سندھ نے کہا تھا کہ عمر شریف کے امریکا سے علاج کروانے کے تمام انتظامات تقریباً مکمل ہوچکے ہیں اور اداکار آئندہ 24 سے 36 گھنٹے کے اندر روانہ ہوجائیں گے۔خیال رہے کہ سندھ حکومت نے 14 ستمبر کو عمر شریف کے علاج کے لیے 4 کروڑ روپے کے فنڈز بھی جاری کیے تھے جبکہ وفاقی حکومت نے بتایا تھا کہ اداکار کو 16 ستمبر تک ویزا مل جائے گا۔