حمزہ علی عباسی نے آئٹم سانگز کو خواتین کی توہین قرار دیا

?️ 30 جون 2021

کراچی (سچ خبریں)پاکستان کے معروف اداکار و میزبان حمزہ علی عباسی نے آئٹم سانگز پر شدید رد عمل کا اظہار کرتے ہوئے  کہا ہے کہ  آئٹم سانگز پر پابندی ہونی چاہیے، کم از کم پاکستان میں آئٹم سانگز بند ہونے چاہئیں آئٹم نمبرزگانے سراسر خواتین کی توہین ہیں۔

حمزہ علی عباسی کی جانب سے حال ہی میں ایک انٹرویو دیا گیا ہے جس میں انہوں نے اپنی بچپن، جوانی، نجی و پیشہ ورانہ زندگی سے متعلق اپنے مداحوں کو بہت سے ایسے پہلوؤں سے روشناس کرایا ہے جو کہ اس سے قبل کسی کو معلوم نہیں تھے۔

حمزہ علی عباسی سے شو کی میزبان کی جانب سے فلموں کی ریٹنگ بڑھانے کے لیے آئٹم نمبرز کا سہارا لینے اور اِن سے متعلق سوال پوچھا گیا۔جس کا جواب دیتے ہوئے حمزہ علی عباسی کا کہنا تھا کہ ’آئٹم سانگز پر پابندی ہونی چاہیے، کم از کم پاکستان میں آئٹم سانگز بند ہونے چاہئیں، آئٹم سانگز سراسر خواتین کی توہین ہیں۔

حمزہ علی عباسی کا مزید کہنا تھا کہ ’عوام، بچے بوڑھے اتنا سیاستدانوں کو فالو نہیں کرتے ہیں جتنا فنکاروں کو فالو کرتے ہیں، اگر وہ قمیص پہنے بغیر کوئی تصویر بنوائیں اور سوشل میڈیا پر پوسٹ کریں یا پھر اگر کوئی ٹی وی ڈرامہ کی اداکارہ آئٹم سانگ کے لیے کم کپڑے پہنے تو بچوں کے ذہنوں پر کیا اثر پڑے گا۔حمزہ علی عباسی نے اپنے انٹرویو کے دوران مزید کہا کہ ’آٹم سانگ کے گانے کے بول نہایت گندے ہوتے ہیں جو کہ صرف اُن کے خیال میں خواتین کی توہین ہے۔